"  ربِ  کائنات "

                       کامل ہے جو ازل سے ، وہ ہے کمال تیرا 

                       باقی ہے جو ابد تک ، وہ  ہے جلال  تیرا

ٰہے عارفوں کو حیرت اور منکروں کو سکتہ

ہر دل پہ  چھا  رہا  ہے ،   رعب   جلال  تیرا 

                       گو حکم تیرے لاکھوں یاں ٹالتے رہے ہیں 

                       لیکن  ٹلا  نہ ہر گز ،  دل  سے  خیال  تیرا 

پھندے سے تیرے کیوں کر ، جائے نکل کے کوئی 

پھیلا   ہوا  ہے  ہر  سُو  ،  عالم   میں   جال   تیرا 

                      اُن کی نظر میں شوکت ، جچتی  نہیں کسی  کی 

                      آنکھوں  میں  بس رہا ہے  جن  کی  جلال  تیرا 

دل ہو کہ  جان ، تجھ سے کیوں کر عزیز رکھیے 

دل ہے سو چیز  تیری ،  جاں  ہے  سو  مال  تیرا 

                       بیگانگی   میں   حالی ،    یہ   رنگ    آشنائی 

                       سن سن کے سر دُھنیں گے ، قال اہل حال تیرا